Fahamu Kwanini Kesho si Rafiki wa Mafanikio Yako

“Kuipoteza siku ya leo nikupoteza mafanikio ya kesho” ~ Cypridion Mushongi

Katika maisha yetu ya kila siku,  neno “kesho” linatumika sana kama njia pekee ya kuhairisha mambo mengi, ambayo kimsingi yalitakiwa yafanyike “leo”. Kesho ni miongoni mwa maneno yanayopendwa kutumiwa kama kinga ya kukataa kutimiza majukumu fulani ya leo. Badala ya mtu kusema “HAPANA” kitu hiki, anajibanza nyuma ya...

kesho, huku akidhani kuwa ataweza kufanya au kutimiza majukumu ya leo siku ya kesho. Matokeo yake, kesho ikifika anasogeza tena mbele kwasababu kuna kesho nyingi mbele yake. Kwa maneno mengine ni kwamba, tunahitaji kujiadhari sana na “kesho” kwani bila kufanya hivyo, tutajikuta kwenye hali ya umaskini wa mkubwa.

Ni ukweli usiopingika kuwa neno baya kuliko maneno mengine na linaloongoza kwa kuharibu maisha ya binadamu ni neno liitwalo “Kesho”. Watu wengi hasa  maskini, watu ambao hawajafanikiwa, wasiokuwa na furaha, na wale wasiokuwa na afya njema ni kundi la watu ambao upendelea sana kutumia neno “kesho”.

Ndiyo maana watu wa namna hii, mara nyingi upendelea kusema maneno kama “nitaanza uwekezaji kesho au “nitaanza kutumia lishe bora kesho” au nitaanza mazoezi ya kupunguza uzito kesho! Wengine usikika wakisema “ nitaanza kusoma vitabu au mtandao kesho.

Ukichunguza kwa undani unagundua kuwa neno “kesho” linatumika sana kumaanisha kuwa jambo fulani litaanza kufanyika siku ambayo siyo ya leo. Ndiyo maana utasikia nitaanza hiki siku ya kesho, wiki, mwezi, mwaka kesho au wakati ujao.

Kwanini watu upendelea kusema kesho?

Sababu ni moja tu kwamba tunayo hulka ya kupenda kufanya vitu vingi kwa mara moja na ambavyo haviko katika mpango maalum. Tunapenda sana kufanya kazi kwa kufuata kasi ya matukio yanayoendelea kutokea. Kwahiyo, mambo au shughuli za leo zinapozidi uwezo unaamua kuzipeleka siku ya kesho. Kwa mfano unaweza kukuta kwamba kufika saa sita mchana wa leo, tayari umekwisha hairisha shughuli za kutosha siku nzima ya kesho.

Lakini uzoefu unaonyesha kuwa unapoona kitu hujakifanya leo, basi ujue siyo muhimu. Kuhusu kitu gani muhimu ufanye leo, hakiji hivi hivi, ni lazima shughuli zako nyingi za kila siku zifanyike kwa kulenga ndoto yako ya maisha yaweza kuwa ni miaka mitano, kumi au na zaidi.

Bila kuwa na ndoto au maono juu ya maisha unayotaka kuyaishi, lazima utaendelea kufanya kazi zako nyingi kwa kufuata matukio ya siku husika. Mwisho wake kila utakapofanya tathmini ya miaka 5 au 10 iliyopita unajikuta umezidi kurudi nyuma, hapo ndipo utaanza kutafuta wa kumlaumu. Kuchanganyikiwa kwa watu wengi ambako uambatana na msongo mkubwa wa mawazo, mara nyingi uja kwa njia hii.  

Kwahiyo, ni muhimu kwetu wote tunaotaka maisha huru kutambua kuwa vitu vyote muhimu kwa maisha yetu ni vile vinavyofanyika leo. Maisha yako siyo kesho, wiki, mwezi, mwaka au miaka kumi ijayo BALI maisha halisi, ambayo una fursa ya kufanya kazi itakayo kuletea mafanikio makubwa siku za mbeleni ni pale unapoamka kitandani asubuhi hadi muda ule unapolala usiku. Unapofikia hatua ya kulala baada ya kuwa umefanya kazi mbalimbali mchana kutwa basi ujue ukilala maisha yameishia hapo.

Ni muhimu tukafanya yale yote yaliyo muhimu leo. Ukishatambua hilo, utakuwa wa kwanza kuona umuhimu wa kuianza siku yako mapema alfajiri. Makala hii unayoisoma wakati huu, nimeanza kuiandika leo usiku huu saa “tisa na dakika ishirini na sita hadi kumi na moja alfajiri”. Nafanya hivi ili kuipanua siku ya leo, ambapo kwa kufanya hivyo, ninapata uwezo wa kufanya vitu vingi muhimu siku ya leo. Kwa maana nyingine ni kwamba ili tupate mafanikio tuliyoyalenga na zaidi, lazima tuwe watu wa kuanza siku yetu mapema.

Kwa tulioajiriwa, bado tusiwe na wasiwasi na muda kwasababu wengi wa waajiri wetu wanadhibiti masaa nane tu! Na sisi tunadhibiti masaa 16 yaliyobaki.  Kwahiyo, tukijipanga vizuri tunaweza kujikuta tunayo masaa 8 ambayo tunaweza kuyawekeza kwa faida. Haya masaa 8 yanajumuisha yale masaa kabla ya saa moja na nusu asubuhi na baada ya saa tisa na nusu alasiri hadi saa nne usiku kabla ya kulala.

Ukiharibu masaa yale kuazia unapoamka asubuhi hadi unapokwenda kulala usiku, ujue kuwa umeharibu maisha yako. Kushindwa hakuji siku moja BALI ni matokeo ya kushindwa kidogo kidogo kila siku. Ukiona umeshindwa au unakabiliwa na umaskini usifikiri ni jambo ambalo limetokea leo bali ni kutokana na wewe kuchezea yale masaa ya kuanzia unapoamka hadi  unapolala.

Kwa wale wasomaji wa MAARIFA SHOP ambao ni vijana, mnaweza kusema “LEO NDIYO DILI”. Hii ikiwa na maana kwamba tukifanya kazi sana leo tutapata ushindi au mafanikio kidogo na kesho tukifanya kama au zaidi ya leo tutapata mafanikio kidogo.

Yale mafanikio kidogo kidogo tunayovuna kila siku ndiyo kwa ujumla wake yatatufanya kuwa na mafanikio makubwa miaka 5 au 10 ijayo na hapo ndipo wengi watakapoanza kukutambua kwamba na wewe huwa upo!

Jitahidi kuipenda na kuikumbatia LEO na uachane kuwa na mpenzi wa KESHO kwasababu, neno hili linaharibu sana maisha ya watu wengi kuliko maneno mengine. Achana na neno“kesho” kwasababu haitatokea huione kesho. Kesho huwa haipo. Kesho huwa ipo tu kwenye akiri za watu waota ndoto bila vitendo na wale washindwa. Nimalizie kwa kusema kuwa sijawahi kuiona “kesho” kitu tulichonacho pekee ni “Leo”.  LEO ni neno la washindi na KESHO ni neno la washindwa.

Unahitaji kujifunza vitu rahisi vya kufanya, ili kuifanya siku ya leo iwe na mafanikio. Fanikisha hili kwa kubonyeza neno “MAARIFA SHOP” kisha weka barua pepe yako kwa mafunzo ya uhakika zaidi.