CHAGUZI UNAZOFANYA KILA SIKU NDIO SIRI YA MAFANIKIO YAKO

Kitu pekee cha kukuhakikishia mafanikio makubwa siyo wewe kuwa smart bali ni tabia ya kuwa chanya, na kufanya/kuweka nguvu kidogo kidogo kila siku na kwa muda mrefu.

Kumbe wakati mwingine tumekuwa tukitamani sana kufanikiwa Katika maisha lakini mara nyingi tumejikita Katika kufanya vitu au kuwekeza kwenye miradi mikubwa na midogo na wakati huohuo kutaka hayo mafanikio yaje ndani ya muda mfupi. Lakini, wakati tukitafuta mafaniakio hayo, tumekuwa hatuna utamaduni wa kubadili mambo madogo madogo ambayo huwa tunachagua kuyafanya kila siku tunapoamka mpaka wakati wa kulala. Watu wengi waliofanikiwa, wanatufundisha kwamba ni lazima tubadili hayo mambo tunayo chagua  kufanya kila siku, ili yaweze kuendana na mafaniko au malengo yetu. Mafanikio yanatokana na kuchagua kufanya vitu Fulani Fulani kila siku na kuhakikisha unarudia kuvianya kwa muda mrefu.

Katika maisha kuna mambo madogo madogo unayochagua kufanya kila siku, na mambo hayo huwa yana tabia ya kujidurufu aidha kwa kukurudisha nyuma au kukupeleka mbele. Ukweli ni kwamba, maisha tuliyonayo sasa ni malimbikizo ya chaguo (choices) tunazofanya kila siku. Mfano: uamuzi wa kula nyama tena za mafuta kila siku; uamuzi wa kununua vitu vya anasa kawanza kabla ya kutumia pesa kuwekeza kwenye miradi ya uzalishaji, vyote hivi ni chaguo ambazo ni sahihi kwako binafsi. Chaguo pamoja ma maamuzi yetu tunayofanya kila siku yamekuwa aidha ni rafiki au adui yetu mkubwa Katika kuleta mafanikio.

Chaguo tunazofanya kila siku, zinanikumbusha kisa alichowahi kunisimulia rafiki yangu mmoja; kwamba kulikuwa na bwana mmoja ambaye alichagua kumkopesha rafiki Kiasi cha shilingi 120,000/- kwa makubaliano kwamba angezirudisha baada ya mwezi mmoja lakini mwezi ulipoisha, Yule rafiki hakurejesha ile pesa mpaka jamaa alikaa karibia mwaka mzima ndipo akaamua kudai pesa ile kwa namna ya pekee. Lakini kabla alijitafakari ili kuona kama alishiriki Katika kusababisha kero hiyo ya kutolipwa pesa yake au la!. Alipotafakari sana aligundua kuwa naye alihusika; kivipi wakati yeye ni mdai? Kumbe kuhusika kwake ni pale tu alipofanya uchaguzi wa kukubali kumkopesha huyo rafiki yake. Baada ya kutambua ukweli huu, aliamua kumpa rafiki ya muda wa wiki moja, na kwamba kwa namna yoyote ile asipokuwa amemlipa, hasilipe tena na deni hilo litakuwa limefutwa na hakuna kudaiana tena. Rafiki yake kusikia hivyo aliweza kulipa pesa hiyo ndani ya muda wa siku tatu kabla ya muda aliopewa kuisha.

Katika stori hii tunajifunza viu vingi sana, moja ni kwamba ni vizuri kukumbuka chaguzi unazofanya ili baadae uweze kuwajibika kwa matokeo yake; pili iwapo unatambua uchaguzi ulio ufanya huko nyuma ni rahisi kujiepusha na kuwatwisha lawama asilimia 100% watu wengine, kwani tumeona baada ya huyo mtu kutambua kuwa alihusika kwenye sakata zima la kero hii ya kutolipwa, aliamua kuwajibika kwa kufanya maamuzi ya kuweka muda wa kulifuta deni hilo ili aweze kuendelea na mambo mengine. Kingine cha kujifuza ni kwamba mara nyingi hizi chaguzi tunazofanya kila siku bila kujitambua kama tumefanya hivyo, huwa zinasahaurika haraka kiasi kwamba yanapotoka matokeo mabaya, haraka haraka huwa tunadhani ni kwasababu ya watu wengine na matokeo yake tunaingia kwenye mivutano na migongano ya kimasirahi na watu mbalimbali waliotuzunguka.

Makosa yanayotokana na chaguzi za kufanya mambo madogo madogo tunayofanya kila siku, huwa yanaleta madhara makubwa kutokana na ukweli kwamba, wakati tunapofanya chaguzi hizi huwa hazionekani haraka – Kiasi cha kuona kama vile hakuna jambo lililofanyika. Kwahiyo, ili tuweze kutambua na kudhibiti chaguzi na maamuzi yetu wenyewe, hatua ya kwanza kuelekea kwenye mafanikio ni kujitambua kwanza, hii ikiwa ni pamoja na kutambua na kubaini chaguzi zote tunazofanya kila siku kuanzia tunapo amka hadi tunapo lala. Kwa kufanya utambuzi huu tutaweza kufahamu chaguzi na maamuzi gani ni mazuri na yapi ni mabaya; halafu yale mazuri tuchague tena kuendeleza kwa kuyafanya kila siku ili baadae higeuke kuwa tabia yetu itakayofanana na aina ya maisha tuyatakayo. 

Mpendwa msomaji, endelea kuitumia vizuri MAARIFASHOP ili kujifunza mambo mbalimbali yatakayokuwezesha kupata mafanikio. Ili kupata makala mpya kila zinapochapishwa, bonyeza neno TUMA MAKALA MAARIFASHOP kisha sajiri barua pepe yako. Na kama unapenda kupata mafunzo ya kila siku kwa njia ya whatsap bonyeza neno MAFUNZO. 

~ TWENDE KAZI PAMOJA ~