Hii Ndiyo Sababu ya Watu Wengi Kukosa Kazi Katika Nchi Yenye Kazi Nyingi

Nadharia ya kutafuta kazi eti! Inayoendana na mapenzi yako Ndiyo chanzo cha watu wengi kuchagua kazi na kuishia kukosa kazi. Wataalam wa masuala ya kazi na Ujasiriamali wanasema kuwa, Katika ulimwengu wa kazi kuna makundi makuu mawili yote yakitofautiana kulingana na mtizamo juu ya “kazi” . Kundi la kwanza lina mtizamo wa kujiuliza swali la “dunia inaweza kumpatia mtu kitu gani kinachoweza  kumridhisha au kumfurahisha”? (Passion Mindset) na kundi la pili lina mtizamo wa kujiuliza swali la “Mtu anaweza kuipatia dunia kitu gani kitakacho wafurahisha au kuwapendeza watu”? (Craftsman Mindset).

Katika Utafiti uliofayika duniani imekuwa ni vigumu sana watu wa kundi la kwanza kuweza kufanya kazi kwa bidii na kuishi kwa furaha. Kukosekana kwa furaha kazini, siyo tu kumetokana na maslahi duni bali ni kutokana na ukweli kwamba, ni vigumu kampuni husika kuweza kumridhisha kila mtu kwa jinsi apendavyo bila kuingilia maslahi ya kampuni hiyo, kwa hiyo kinachotokea ni ni huyo mtu kuanza kupambana na mwajiri kwa kudai mambo ambayo yanaweza kumfurahisha au kumridhisha kama yeye binafsi. Na iwapo mambo hayo hayapati basi migogoro na mwajiri inaanza mara moja, matokeo yake mtu anaanza kuishi kwa misuguano mingi na mwisho wa yote anaishi bila furaha kila anaposhindwa kupata maslahi aliyotarajia kipindi kile alipo wazia dunia itampatia nini.

Kutokana na mtizamo wa “dunia itakupatia nini” mtu huendelea kujaribu huku na kule akiwa ujatulia kabisa, huku ukitafuta chochote cha kupata kutoka kwenye dunia. Mara nyingi, maisha ya namna hii, huwa ni ya kubahatisha au kujaribu jaribu. Katika kubahatisha, mtu anafika mahala dunia inampatia fursa ya kazi (ajira) kutoka kwa watu wengine waliotengeneza kazi, hapo ndiyo hujenga matumaini na matarajio makubwa ya kukidhi furaha yake na tamaa zake nyingine kutoka kwenye ajira aliyopewa. Baada ya kipindi kifupi, mtu huyu ghafla unashangaa hapati kile kilichokuwa kinamfurahisha kwenye kazi ya ajra aliyopewa miaka miwili iliyopita.

Hali ya kutopata kile alichotarajia mwanzo, humfanya huyo mtu kutafuta suluhisho la haraka, ambalo huwa ni ni kutafuta sehemu nyingine yenye kumpatia furaha na maslahi mazuri zaidi na hapo anafurahia kwa muda na baadae tena kero mpya zinaibuka upya. Kwahiyo, inakuwa ni mzunguko ambao unakuwa maisha yenye furaha kipindi kifupi na kipindi kirefu cha kero nyingi; hali ambayo husababisha kiwango kidogo sana cha ufanisi, ikiwa ni pamoja na uzalishaji chini ya kiwango inachotegemewa. Watu wengi katika kundi hili la kwanza, hawapendi kazi wanazozifanya, isipokuwa wanaendelea kufanya kazi kwasababu wanalipwa pesa.

Kutokana na kuhamahama kwa watu ambao tayari wana kazi (ajira) kutoka mwajiri mmoja kwenda mwingine, ndiyo sababu ya kuongezeka kwa kundi la watu wanaotafuta ajira. Kwani kunakuwa na kundi la vijana ambao ni wapya (walio hitimu karibuni) na kundi la zamani wote wakishindana kupata nafasi chache zilizoko kwenye soko la ajira. Kundi la watu wa zamani, ambao kimsingi ni wazoefu, wanatumia kigezo cha uzoefu ujuzi kazini kuwashinda wapya hasa katika nafasi zinazosemekana zina marupurupu makubwa.

Kwa upande wa kundi la pili lenye mtizamo wa “Mtu anaweza kuipatia dunia kitu gani kitakacho wafurahisha au kuwapendeza watu?; Mtizamo huu unafanana sana na mtizamo watu wa sanaa na maonyesho kwa ujumla. Kundi hili kwa kuongozwa na mtizamo huu, kila mara lina jaribu kuumiza vichwa vyao kufikiri na kutafakari ni kitu au vitu gani waifanyie au waipatie dunia!. Kwakuwa kundi hili linashughulika tu na kufikiria cha kufanya, linajikuta swala zima la kazi siyo tatizo kwasababu ni watu wa kundi hili wanaoibua na kutengeneza kazi. Kundi hili linapokuwa limeibua na kutengeneza kazi ndipo linajikuta likikabiliwa na majukumu mengi yaliyopo mbele yake katika kufanikisha kazi hizo. Hili kukabiliana na majukumu hayo, kundi hili hulazimika kutafuta watu waliobobea katika fani mbalimbali, ili waweze kusaidia katika kutimiza na kufanikisha malengo ya kazi husika. Mfano chukulia ‘Wasanii wa muziki na firamu za kitanzania’ ukitafiti watu hawa utagundua kuwa wanaipenda sana kazi yao, na kutokana hali hiyo kupenda kazi yao, wemeweza kuwekeza nguvu na maarifa yao yote na matokeo yake, wameweza kutegua kitendawili cha ajira , jambo ambalo linaonekana kuwaelemea sana wasomi wengi hasa wanaotoka vyuoni.

Katika nchi zote duniani, wanaomiliki uchumi wa nchi huska ni wale tu walio na utashi na uwezo wa kutengeneza kazi, na hii ni kutokana na ukweli kwamba faida yote inayotokana na kazi husika mara nyingi inachukuliwa na yule tu! aliyetengeneza kazi, waliobaki bila kujali idadi yao kwenye kazi husika, wanaendelea kuhesabika kama sehemu ya gharama za uendeshaji. Kwa hapa Tanzania, wasomi wengi tunayo nafasi nzuri zaidi ya kuweza kutengeneza kazi kuliko wale ambao hawakusoma, kwasababu, wasomi ni rahisi kupata ujuzi na habari za mambo mbalimbali yaliyoko duniani na kuzitumia katika maamuzi ya kutengeneza kazi mbalimbali ambazo zingeweza kuvuta maendeleo ya haraka hapa nchini. Cha ajabu kabisa, hapa Tanzania, wale ambao hawakubahatika kuedelea na shule, ndio wengi wao waliamua kutengeneza kazi na wemejiendeleza Kiasi cha kubobea katika kazi hizo hizo walizozitengeneza. Kwasasa, watu hawa ndio wanaendesha uchumi wa nchi huku wakitoa pia ajira kwa wasomi ambao wangeweza kutengeneza kazi nyingine nyingi zaidi.

Watu wengi katika kundi hili linaloongozwa na mtizamo wa “nitaipatia nini dunia”? wanapenda sana kazi zao ambazo wamezitengeneza wenyewe. Na kwasababu hiyo; wanazifanya kwa moyo, umakini, kujituma na kwa juhudi na maarifa. Mambo yote haya, ni nadra sana kuyakuta kwenye kundi la kwanza ambalo ni la wenye mtizamo wa “dunia itanipatia nini”?. Kundi hili la pili, ndio wanaotoa ajira kwa wale wanaoitwa “wasomi” na hii nikutokana na ukweli kwamba, wale ambao hawakusoma walijikuta wakilazimika kutengeneza kazi ili waweze kuishi. Mfano ni wakulima, wasindikaji; wavuvi, wafugaji; wasanii, wafanyabiashara, mafudi n.k. bila watu hawa mambo hayaendi na serikali inategemea sana kundi hili kupata pesa za kugharimikia huduma za jamii.

Mwisho nipende kusema kuwa, kazi zinazo subili kutengenezwa zipo nyingi sana hapa Tanzania, lakini ajira ambazo zinatafutwa na watu wengi ndizo chache sana. Kwa maana nyingine, ajira haziwezi kuwa nyingi kama kazi zinazotengenezwa ni chache sana. Ewe mtanzania jiunge na mtandao wa watengeneza kazi, ili uweze kufanikiwa na kuishi maisha yenye furaha. Kuanzia leo, acha kulalamikia watu wengine kwa mambo ambayo ni majukumu yako na jitenge kabisa na watafuta ajira. Bila kujali umesomea nini, anza leo kufikiria ni kitu gani unaweza kuwapatia watu wakafurahi kwa kukidhi mahitaji yao, na iwapo utafanya hivyo, basi utakuwa umepata suluhisho la kudumu na hivyo kuweza kutegua kitendawili cha “kazi” maisha yako yote.

Mpendwa msomaji, endelea kuitumia vizuri MAARIFASHOP ili kujifunza mambo mbalimbali yatakayokuwezesha kupata mafanikio. Ili kupata makala mpya kila zinapochapishwa, bonyeza neno TUMA MAKALA MAARIFASHOP kisha sajiri barua pepe yako. Na kama unapenda kupata mafunzo ya kila siku kwa njia ya whatsap bonyeza neno MAFUNZO. 

~TWENDE KAZI PAMOJA~